கருத்துமுதல்வாதமும் பொருள்முதல்வாதமும்

தன்னைச் சுற்றியுள்ள உலகத்தை அறிந்து கொள்ள வேண்டும் என்ற மனிதனது தேடலில் இருந்து தத்துவக் கண்ணோட்டங்கள் தோன்றின.

சமூகம் வர்க்கமாக பிரியும் போது, நடைமுறையில் காணப்படும் சமூகத்தை நிலைநிறுத்துவதற்கு  -நியாயப்படுத்துவதற்கு- தத்துவம் முயற்சிக்கும் போது, அத்தத்துவம் சார்புத் தன்மையை பெறுகிறது. இந்த சுரண்டலுக்கு ஆதரவுதருகின்ற தத்துவப் போக்கிற்கு கருத்துமுதல்வாதம் என்று பெயர். மற்றொன்று பொருள்முதல்வாதம்.இது சுரண்டலுக்கு எதிராககுரல் கொக்கிறது.

தத்துவத்தின் அடிப்படை கேள்விக்கு அளிக்கப்படும் பதிலைக் கொண்டு பொருள்முதல்வாதம், கருத்துமுதல்வாதம என்று பிரித்தறியப்படுகிறது.

ஆன்மா முதலா? இயற்கை முதலா?

இதற்கு ஆன்மா முதல் என்று கூறுபவர்கள், கருத்துமுதல்வாதிகள் என்றழைக்கப்படுகின்றனர். இவர்கள் இயற்கையின் தோற்றத்துக்கு ஆன்மா தான் காரணம் என்று விளக்குகின்றனர். இவர்களது விளக்கம் உலகம் ஏதோ ஒரு விதத்தில் படைக்கப்பட்டது என்ற அனுமானதத்தில் இருந்து தொடங்கிறது.

இயற்கை தான் முதன்மையானது என்று கருதுபவர்கள் பொருள்முதல்வாதத்தின் பல்வேறு பிரிவினைச் சேர்ந்தவர்களாவர்கள்.

இதனை எங்கெல்ஸ் (லுத்விக் ஃபாயர்பாக்கும் மூலச்சிறப்புள்ள ஜெர்மன் தத்துவஞானத்தின் முடியும்) கருத்துமுதல்வாதம், பொருள்முதல்வாதம் என்னும் இவ்விரண்டு கூற்றுகளும் தொடக்கத்தில் இதைத் தவிர வேறு எதையும் குறிக்கவில்லை. தமது நூலிலும் வேறு எந்தப் பொருளிலும் அவை பயன்படுத்தப்படவில்லை. அவற்றுக்கு வேறு ஏதாவது பொருள் தரும்பொழுது, குழப்பத்தையே ஏற்படுத்தும் என்று கூறியிருக்கிறார்.

தத்துவத்தின் அடிப்படை கேள்வியில் மற்றொன்றும் இருக்கிறது, எதார்த்த உலகத்தை அறிந்துணரும் திறம் நம் மனித சிந்தனைக்கு உண்டா?

கருத்துமுதல்வாதக் கண்ணோட்டத்தில் இதற்கு ஆம் என்றும் இல்லை என்று இரண்டுவிதமான பதிலளிப்பவர்கள் இருக்கின்றனர். இல்லை என்பவர்கள் அறிவொண்ணாவாதி என்றழைக்கப்படுகின்றனர்.  இவர்கள் உலகத்தை முழுமையாக அறிந்துணர்தல் என்பது சாத்தியம் இல்லை என்கின்றனர்.  இவர்களில் நவீன தத்துவ அறிஞர்கள் ஹியும், கான்ட் ஆகியோராவர். இவர்களின் கண்ணோட்டத்தை மறுப்பதற்குரிய தீர்மானகரமான கருத்தை புறநிலைக் கருத்துமுதுல்வாத நிலையிலிருந்து அறிந்துணர்தல் சாத்தியம் என்று ஹெகலால் கூறப்பட்டது. ஆனால் ஆம் என்பவர்களின் புகழ் பெற்ற அறிஞரான ஹெகல் அவர்களின் அறிய முடியும் என்ற கூற்று, கஅறுதி கருத்துக என்ற பிரம்மத்தின் படிப்படியான மெய்யுருவக்காட்சியாக விளக்கப்படுகிறது. அதாவது, எதார்த்த உலகில் நாம் அறிந்துணர்வது, துல்லியமாக அதன் எண்ண உள்ளடக்கத்தைத்தான், அந்த எண்ண உள்ளடக்கமே உலகத்தை நிரந்தரக் கருத்து (absolute idea) அதாவது பிரம்மத்தை அறிதல் என்ற நிலைக்கு அவர்கரின் தத்துவம் செல்கிறது.

இந்தியாவைப் பொருத்தளவில் அகநிலைக் கருத்துமுதல்வாதிலிருந்து விடுபட முடியாமல் பலர் இருக்கின்றனர்.  விவேகானந்தரைத் தொடர்ந்து நவீன காலத்தில் பல்வேறு அகநிலைக் கருத்துமுதலவாத சிந்தனையாளர்கள் இன்றைய நவீன வடிவத்துடன் காணப்படுகின்றனர். இதில் பல்வேறு இந்திய கம்யூனிஸ்டுகளும் மார்க்சிஸ்டுகளும் அடங்குவர். தங்களை மார்க்சியவாதிகள் என்றழைத்துக் கொள்பவர்களில் பல அறிஞர்கள் அகநிலைக் கருத்துமுதல்வாதப் பிடியிலிருந்து இன்னும் மீளாமல் இருக்கின்றனர்.

உலகில் காணப்படும் அனைத்துப் பொருட்களும் மனித உணர்வின் விளைபொருட்கள் என்று அகநிலைக் கருத்துமுதல்வாதத்தினர் கருதுகின்றனர். இவர்களில் புகழ் பெற்ற சிந்தனையாளர்கள் இங்கிலாந்தில் பெர்க்லி, ஆஸ்திரிரேலியாவில் மாஹி, இந்தியாவில் ஆதிசங்கரர், ரமணர், விவேகானந்தர் போன்றோர்.

அகநிலைக் கருத்துமுதல்வாதத்தின் நவீன வடிவமாக நேர்காட்சிவாதம், இருத்தலியல், பின்நவீனத்துவம் போன்றவற்றை குறிப்பிடலாம்.

புறநிலைக் கருத்துமுதல்வாதிகள், காணப்படும் உலகம், மனித உணர்வு நிலைக்கு அப்பாற்பட்டதும் வெளியில் இருக்கக் கூடியதுமான முழுமுதற் கருத்தின் விளைபொருள் என்றுரைக்கின்றனர்.

புறநிலை கருத்துமுதல்வாதத்தின் புகழ்பெற்ற சிந்தனையாளர்கள், கிரேக்கத்தில் பிளாட்டோ, ஜெர்மனியில் ஹெகல், இந்தியாவில் ராமானுசர், மத்துவர் போன்றோர்கள்.

மார்க்சிய இயக்கவியல் பொருள்முதல்வாதம் இயற்கையும் சமூகத்தையும் அறிந்திட முடியும். இவை இரண்டும் நமக்கு புறத்தே நம்மை சார்ந்திடாமல் புறநிலையில் இயங்குகின்றன என்கிறது.

இயற்கை பற்றிய அறிதலை இயக்கவியல் பொருள்முதல்வாதம் என்றும், சமூகம் பற்றிய அறிதலை வரலாற்றியல் பொருள்முதல்வாதம் என்று தத்துவத்தை இரண்டு பிரிவாக மார்க்சியம் பகுத்தளிக்கிறது.

பொருள்முதல்வாத சிந்தனையாளர்கள், உலகை உள்ளது உள்ளபடியே காணவேண்டும் என்பதையும், உலகின் பொருளாயத ஒருமையின் அடிப்படையை பருப்பொருளில் பார்க்க வேண்டும் என்றும் வலியுறுத்துகின்றனர்.  

பொருள்முதல்வாத சிந்தனையில் புகழ்பெற்றவை கிரேக்கத்தில் டெமாக்கிரிட்டஸ் தத்துவம், இந்தியாவில் சாங்கியம், ஆதிபுத்தர், உலகாயதர். சார்வாகர், அணுவாதம் பேசும் வைசேஷிகர் போன்றோரின் சிந்தனைகள்.

இயக்கவியல் பொருள்முதல்வாத  சிந்தனையாளர்யாளர்களில் புகழ்பெற்றவர் மார்க்ஸ், எங்கெல்ஸ், லெனின், ஜார்ஜ் தாம்சன், இந்தியாவில் தேவிபிரசாத் சாட்டோபாத்தியாயா, கோசாம்பி, ஆர்.கே.சர்மா, நா,வானமாமலை, இலங்கையில் கைலாசபதி போன்றோர்கள்.

தத்துவத்தின் அடிப்படைக் கேள்விகளுக்கு அளிக்கப்படும் பதிலின் அடிப்படையில் தான் அவரவர்களது உலகக் கண்ணோட்டம் உருவாகிறது. இந்த உலகக் கண்ணோட்டத்தின் அடிப்படையில் தான் தாங்கள் சந்திக்கின்ற பிரச்சினைகளுக்கான அணுகுமுறையை அமைத்துக் கொள்கின்றனர்.

கருத்துமுதல்வாதமும் பொருள்முதல்வாதமும் குறிப்பிட்ட வர்க்கங்களின் நலன்களோடு தொடர்புடையவை என்கிறது மார்க்சியம்.

மற்றொரு போக்கும் இருக்கிறது. பொருள்முதல்வாதமும் கருத்துமுதல்வாதமும் அளிக்கின்ற பதிலைத் தாண்டி, எங்களது கண்ணோட்டம்  மேலானதும் அதற்கு அப்பாற்பட்டதும் ஆகும் என்றுரைக்கின்றனர். இவர்களின் இப்போக்கு தத்துவம் எழுப்புகின்ற கேள்விகளை தவிர்க்க முயற்சிக்கிறது.

தத்துவத்தில் இரண்டு கண்ணோட்டத்துக்கு இடையே நடுபோக்கு என்று ஏதும் கிடையாது. ஓன்று பொருள்முதல்வாதம் மற்றொன்று கருத்துமுதல்வாதம். தத்துவம் எழுப்பும் கேள்விக்கு பதில் அளிப்பதில் இருந்து விலகுவதின் மூலம் இவர்கள் கருத்துமுதல்வாதப் போக்கையே பின்பற்றுகின்றனர்.

அனைத்து கருத்துமுதல்வாதிகளும், மத நம்பிக்கையாளர்களும் தன்னுணர்வோடே பிற்போக்கைக் கைகொள்கின்றனர் என்று சொல்வது மிகவும் எளிமைப்படுத்தப்பட்ட பார்வைத்தான். இவர்களிடையே சில சமூகக் கருத்தில் முற்போக்குடையவர்கள் இருக்கின்றனர் என்பது உண்மையே. ஆனால் கருத்துமுதல்வாதிகளும் மத நம்பிக்கையாளர்களும் விரும்பினாலும்  விரும்பாவிட்டாலும் இந்தக் கண்ணோட்டத்தின் உள்ளடக்கம் பிற்போக்கான வர்க்கங்களின் நலன்களுக்கே இறுதியில் சேவை செய்கிறது.

கருத்துமுதல்வாத மதவழிபட்ட தத்துவம் உலகத்தையும் சமூகத்தையும் புறநிலை உண்மையாக புரிந்து கொள்வதற்கு பெரும் தடையாக இருக்கிறது. எதார்த்த சமூகம் வளர்ச்சி அடைவதையும், அதன் வளர்ச்சியின் விளைவாய் ஏற்பட்ட உள்முரண்பாட்டில் இணக்கம் காண முடியாமை என்ற நிலையை, மறைக்கும்படி முதலாளித்துவ நலன்கள் கோருகிறது. சமூகத்தின் புறநிலை வளர்ச்சியை மறுப்பதற்கு கருத்துமுதல்வாதமும் மதவழிப்பட்ட பிற்கோக்கும் முதலாளித்துவத்துக்கு துணைபுரிகிறது.

இதன்படியே தத்துவம் என்பது கட்சி சார்புத் தன்மையானது என்கிறது மார்க்சியம்.

இயக்கவியல் பொருள்முதல்வாதம் பாட்டாளி வர்க்கம் மற்றும் ஒட்டுமொத்த தொழிலாளிகளின் நலன்களைப் பிரதிபலிக்கிறது. இதில் தான் கம்யூனிஸ்ட் கட்சியினுடைய தத்துவத்தின் வர்க்கச் சார்பு அடங்கியிருக்கிறது.

இயற்கையைப் பற்றிய விதிகளை ஆராய்வது இயக்கவியல் பொருள்முதல்வாதம் என்றும், சமூகம் பற்றிய விதிகளை ஆராய்வது வரலாற்றியல் பொருளம்துலவாதம் என்றும் அழைக்கப்படுகிறது.